Dilqəm məktub yazdı: `İsti paltar lazım deyil`

15:36 12 Noyabr 2016

Erməni işğalçıları tərəfindən Kəlbəcərdə girov götürülən Dilqəm Əsgərov ailəsinə növbəti dəfə məktub göndərib.

Femida.az xəbər verir ki, bu barədə AzVision.az-a girovun oğlu Kürdoğlu Əsgərov bildirib: “Atamdan məktub aldıq. Məktub cəmi üç cümlədən ibarədir. “Həs kəsə salam deyin, isti paltar lazım deyil. Atamdan muğayat olun” -deyə məktubda yazılıb. Atam hər dəfə babamı soruşur, ondan narahat olduğunu hiss etdirir”.

Qeyd edək ki, bir müddət əvvəl Dilqəm Əsgərovun atası Qardaşxan Əsgərov prezident İlham Əliyevə müraciət edib. Q.Əsgərov oğlunun girovluqdan xilas edilməsi üçün ölkə başçısından kömək istəyib.

“Prezidentdən xahiş edirəm ki, oğlumun geri qaytarılmasında bizə yardım etsin. Dilqəmi 3 ildir ki, görmürəm. Oğlum öz ata-baba torpaqlarına gedib. Ora mənim ata yurdumdur. İnanıram ki, prezidentimiz bu məsələdə bizə kömək edəcək. Bir ata kimi arzulayıram ki, mənim meyitimi yerdən oğlum Dilqəm götürsün”.

Xatırladaq ki, ötən ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D. Əsgərov və Ş. Quliyev üzərində qanunsuz “məhkəmə” qurublar. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilmə cəzasına məhkum olunub.

Femida.az